Кулун тутар 21 күнүгэр Аан дойдуга Поэзия күнүн бэлиэтиибит, ол чэрчитинэн биһиги бибилэтиэкэбитигэр суруйааччы Винокурова Татьяна – Сабыйа кэлэн ыалдьыттаата.

Татьяна Ефремовна Үөһээ Бүлүү улууһуттан Маҕаас нэһилиэгиттэн төрүттээх, өр сылларга саха тылын уонна литературатын учууталынан үлэлээбит.

Татьяна Ефремовна оҕолорго айымньылаах үлэтин, инники былааннарын туһунан кэрэхсэбиллээхтик сэһэргээтэ. Литература эйгэтигэр киириитэ 1961с муус устар 12 күнүгэр, Юрий Гагарин космоска көппүтүн истэн үөрүүтүттэн бастакы хоһоонун суруйбут. Уопсайа 40 тахса кинигэ таһаартарбыт, элбэхтик «Кэскил», «Чуораанчык», «Верхневилюйск», «Кыым» хаһыаттарга, сурунаалларга хоһоонноро бэчээттэммиттэр.

Татьяна Ефремовна айар үлэтигэр сыһыаннаах уонна да атын боппуруостарга оҕолор ыйытыыларыгар эппиэтээтэ, тус бэйэтин санаатын, олоххо көрүүтүн оҕолор сэҥээрэ иһиттилэр. Татьяна Ефремовна – Сабыйа түмүккэ саха тыла киһи олоҕор оруолун, төрөөбүт тылынан суруллубут айымньылары ааҕыы улахан суолталааҕын бэлиэтээтэ уонна өйдөбүнньүк хаартыскаҕа түһүү буолла.